Men ózim bilim salasynda kóp jyldar eńbek etkendikten Prezıdentimizdiń óz Joldaýynda bilim salasyna kóp kóńil bólgenin úlken qýanyshpen ári tolqýmen qabyldadym. Atap aıtsaq, Elbasy óz sózinde «Mektepke deıingi bilim berý sapasyn túbegeıli jaqsartý kerek. Bul salada biliktilik talaptaryn, oqytý ádisin, tárbıeshilerdiń jáne balabaqshadaǵy basqa da qyzmetkerlerdiń eńbegine aqy tóleý júıesin qaıta qaraý qajet. Bilim jáne ǵylym mınıstrligi ákimdiktermen birlesip, bıyl tıisti «Jol kartasyn» ázirleýi kerek», dedi. Orta bilim berý júıesinde negizgi tásilder belgilengen, qazirgi kezeńde solardyń oryndalýyna basa nazar aýdarǵan jón.
Sonymen qatar «Pedagog mártebesi týraly» zańdy ázirlep qabyldaý qajettigin aıtty, bul shynymen muǵalimder men mektepke deıingi mekemeler qyzmetkerleri úshin barlyq ıgilikti qarastyryp, júktemeni azaıtýǵa, jónsiz tekserister men mindetten tys fýnksııalardan arashalaýǵa aparatyn birden bir jol dep bilemin. Joldaýda joǵary bilim berý isine de nazar aýdarylǵan. Endi ondaǵy maman daıyndaý sapasyna qatysty talaptar kúsheıtiledi. Bul oqý bitirgen stýdentterdiń jumyspen qamtylýy, jalaqysy joǵary jumysqa ornalasýyna úlken kómek beretinine senemin.
Elbasy óziniń kezekti joldaýynda memlekettik organdar qyzmetiniń tıimdiligin túbegeıli arttyrý máselesin de aıtyp ketti. Bıyl 4 memlekettik organǵa jalaqy tóleýdiń jańa modelin engizip, barlyq pılottyq jobalar jaqsy nátıjeler kórsetti. Tıimsiz shyǵyndardy ońtaılandyrý jáne basshylyq quramyn qysqartý esebinen tómengi jáne orta býyndaǵy qyzmetkerlerdiń jalaqysy 2 - 2,5 ese ósti. Osynyń nátıjesinde memlekettik qyzmetke qyzyǵýshylyq artty, ásirese óńirlik deńgeıde onyń ózektiligi joǵary. Kadrlardyń jumystan ketýi 2 ese qysqardy. Bedeldi joǵary oqý oryndaryn bitirgen túlekterdi qosa alǵanda, biliktiligi joǵary kadrlardyń jeke sektordan kelýi 3 ese artty.
Taǵy bir qýantarlyq jaǵdaı Elbasy quqyq qorǵaý organdarynyń jumysyna tereń jáne sapaly ózgeristerdi engizýdi jón sanady. Ol Úkimetke Prezıdent Ákimshiligimen birlesip, «Ishki ister organdaryn jańǵyrtý jónindegi jol kartasyn» qabyldaýdy tapsyrdy.
«Ishki ister mınıstrliginiń shtattyq sanyn ońtaılandyryp, polısııany ózine tıesili emes fýnksııalardan aryltý qajet. Únemdelgen qarajatty polıseılerdiń jalaqysyn kóbeıtýge, olardyń turǵyn úı jáne ózge de áleýmettik máselelerin sheshýge baǵyttaǵan jón. Sonymen qatar polısııa qyzmetkeriniń jańa standartyn bekitý, mansaptyq ilgerileý, polısııa akademııalary arqyly kadrlardy daıarlaý men irikteý júıesin ózgertý máseleleri de qozǵaldy. Jalpy azamattar sanasynda polıseıler jazalaýshy emes, kerisinshe, qıyn jaǵdaıda kómek kórsetýshi degen túsinik ornyǵýy kerek», deıdi Elbasy.
Bıylǵy Joldaý qazaq halqynyń rýhyn jigerlendirip, boıymyzǵa kúsh-qaırat darytty dep oılaımyn. Qazaqstannyń baǵyndyratyn bıikteri áli alda degenge senimim mol.
Erkin ISIMBAEV,
Kókshetaý qalalyq máslıhatynyń hatshysy
